काठमाडौं, २१ फागुन
नेपाली बजारमा सुनको भाउ हालसम्मकै महङ्गो बन्न पुगेको हो । स्थानीय बजारमा सुनको भाउले नयाँ रेकर्ड कायम गरेको छ । मंगलबार तोलामा ३ सय रुपैयाँले बढेको सुनको भाउ बुधबार २ हजार २ सय रुपैयाँ बढेको छ ।
नेपाल सुनचाँदी व्यवसायी महासंघका अनुसार सुनको भाउ हालसम्मकै उच्च भएको जनाएको छ ।
त्यस्तै, आज बजार तेजावी सुनको पनि २ हजार २ सय रुपैयाँले बढेर ८० हजार २ सय रुपैयाँ पुगेको छ ।
यसअघि पहिलोचोटी २०७० साल भदौ १२ गते एकैपटक तोलामा ३ हजार ४ सय रुपैयाँले सुनको भाउ महङ्गिएको थियो ।
त्यस यता २०७३ साल असार १० गते दोस्रोचोटी तोलामा एकैपटक ३ हजार रुपैयाँले बढेको थियो भने त्यसयता फागुन २१ गते एकैपटक तोलामा २ हजार २ सय रुपैयाँ बढेको हो ।
तीव्र दरमा फैलिरहेको कोरोना भाइरसको महामारीबाट विश्व अर्थतन्त्रमा पर्न सक्ने प्रभाव सीमित बनाउन प्रमुख केन्द्रीय बैंकहरुले ब्याजदर घटाउने अपेक्षा बढेसँगै मंगलबार सुनको भाउले टेवा पाएको हो ।
न्यूयोर्क मर्कन्टाइल एक्सचेन्जको कोमेक्स डिभिजनमा उक्त दिन सुनको भाउ प्रतिऔंस १ हजार ६ सय ढलरसम्मको उच्च बिन्दुमा पुगेको थियो ।
भाइरसको प्रभावबाट अर्थतन्त्रलाई राहत दिन ब्याजदर कटौती गरिने हालैका दिनमा अमेरिकी केन्द्रीय बैंक ‘फेडरल रिजर्भ’ का अध्यक्ष जेरोम पावेल र युरोपेली केन्द्रीय बैंक (इसीबी) अध्यक्ष क्रिस्टियन लागार्दले संकेत दिएका थिए ।
सुनको मूल्य एकाएक बढ्न थालेपछि सुन व्यवयायी समेत दंग परेका छन् । नेपाल सुनचाँदी व्यावसायी महासंघका अध्यक्ष मोहन कुमार विश्वकर्माले कोराना भाइरसको संक्रमण फैलिएसंगै मान्छेहरु आत्तिएर सुनमा लगानी गर्न खोजेको उनले बताए ।
उनले भने , एकतिर डलरको भाउ बढ्नै अर्कोतिर कोराना फैलने, यस्तो भएपछि मानिसहरुले आफ्नो लगानी बैंकमा भन्दा सुनमा सुरक्षित देखे त्यसैले सुनको माग बढ्न गयो र भाउ पनि बढ्यो ।’ कोराना भाइरस नियन्त्रणमा नआएसम्म अन्तराष्ट्रिय स्तरमै यसको असर रहने उनले बताए ।
