काठमाडौ, माघ ९
आधारभूमी संवाददाता
किसानबाट उखु खरिद गरेर त्यसबापत रकम भुक्तान नगर्ने र वर्षाैसम्म झुलाएर राख्ने ३ उद्योग माथि सरकारले बैंक खाता नै रोक्का राख्ने निर्णय गरेको छ । अब अन्नपूर्ण, इन्दिरा र लुम्बिनी सुगर मिल्सले किसानको बक्यौता रकम तिर्न बाहेक अन्य कुनै पनि आर्थिक कारोबार गर्नका लागि आफ्नो खाता प्रयोग गर्न पाउँदैनन् ।
सरकारले उखु किसानको रकम भुक्तानी नगर्ने तीनवटा चिनी उद्योगहरुको बैंक खाता रोक्का गरेको छ । उनिहउखु किसानको बक्यौता रकम भुक्तानी गर्ने बाहेक अन्य कारोबार गर्न नमिल्ने गरी सरकारले कारोबार रोक्ने निर्णय गरेको हो । कारोबार रोक्का राख्नका लागि उद्योग तथा आपूर्ति मन्त्रालयले आन्तरिक राजस्व विभागमा पत्राचार समेत गरिसकेको छ ।
पुस १८ गते उद्योग वाणिज्य तथा आपूर्तिमन्त्री लेखराज भट्ट र उखु किसानबीच भएको सम्झौता बमोजिम उद्योगहिरुले माघ ७ भित्र सबै भुक्तानी दिइसक्नुपर्ने थियो । तर अहिलेसम्म किसानलाई १६ करोड १४ लाख रुपैयाँ मात्रै भुक्तान गरिएको छ भने अझै ८४ करोड २५ लाख रुपैयाँ तिर्न बाँकी छ ।
कारोबार रोक्का भएको अन्नपूर्ण र इन्दिरा सुगर मिल राकेश अग्रवालको हो भने लुम्बिनी सुगर मिल्स मनिष अग्रवालले लिजमा लिएर सञ्चालन गरिरहेका छन् ।
उखु किसानको रकम तिर्न बाँकी रहेका यी उद्योगका सञ्चालकहरु मन्त्रालयको समेत सम्पर्कमा नआएकाले आर्थिक कारोबार रोक्का राख्ने निर्णय गरेको हो ।
सहमति पछि महालक्ष्मी सुगर्स मिलले ११ करोड ५० लाख रुपैयाँ किसानलाई तिरेको छ भने २१ करोड ४० लाख अझै बाँकि छ ।
अन्नपुर्ण सुगर मिलले ४२ करोड र एभरेष्ट सुगर मिलले ७ करोड ९३ लाख रुपैयाँ तिर्न बाँकि छ । त्यसैगरि श्रीराम सुगर मिलले २६ करोड ७७ लाख र बागमती खाडसारी चिनी उद्योगले ८ करोड ४१ लाख रुपैयाँ तिर्न बाँकि छ ।
मन्त्रालयको मध्यस्थतामा चिनी उद्योगीले आधा रकम पुस मसान्तभित्र र बा“की रकम माघको पहिलो हप्तामा दिन सहमत भएका थिए । तर म्याद गुज्रदा सम्म पनि उद्योगीहरु भने सम्पर्कमै आएका छैनन् ।
सहमती पश्चात हिमालय सुगर मिल्स , इन्दुशंकर चिनी उद्योग, इष्टन सुगर मिल, रिलाइन्स सुगर र भागेश्वर सुगरले भने सबै रकम भुक्तान गरिसकेको मन्त्रालयले जनाएको छ ।
किसानको ऋण नतिर्नेलाई सरकार थप कडाई गर्दै जाने मन्त्रालयले जनाएको छ । तर अब ति रोक्का भएका बैंक खातामा के कति रकम छ त उद्योगीको भन्ने छुट्टै अध्ययनको विषय बनेको छ ।
