काठमाडौं, मंसिर २२
देशमा निर्माणाधिन अवस्थामा रहेका राष्ट्रिय गौरबका आयोजनाकै प्रगति सुस्त देखिएको छ । २१ वटा आयोजनामध्ये ११ वटा आयोजनाको प्रगति ५० प्रतिशत भन्दा पनि कम देखिएको छ ।
२०४४ सालमा निर्माण सुरु भएको बबई सिँचाइ आयोजनाले अहिलेसम्ममा जम्मा ४१ प्रतिशत मात्रै काम सम्पन्न गरेको छ । यो भन्दा पुरानो आयोजना लुम्बिनी क्षेत्र विकास कोषको अहिलेसम्म ८२ प्रतिशत मात्रै काम सम्पन्न भएको छ ।
पश्चीम सेती जलविद्युत आयोजना, बुढिगण्डकी जलविद्युत आयोजना र निजगढ बिमानस्थलको आयोजनाको प्रगति अहिलेसम्म शुन्य देखिएको छ । पश्चीम सेती र बुढिगण्डकी जलविद्युत आयोजना दुबै चिनीयाँ कम्पनीले अलपत्र पारेका आयोजना हुन् भने निजगढ बिमानस्थलमा सरकारले नै निर्णय गर्न सकेको छैन ।
माथिल्लो तामाकोसी आयोजनामा भने सन्तोषजनक प्रगति देखिएको छ। अहिलेसम्म तामाकोसी आयोजनाको ९९ प्रतिशत काम सकिएको छ । तामाकोसी जलविद्युत आयोजना छिट्टै सञ्चालनमा आउँदैछ । जुन सञ्चालनमा आएसँगै राष्ट्रिय प्रसारण प्रणालीमा ४ सय ५६ मेगावाट बिजुली थपिनेछ ।
त्यसैगरि निर्माणको अन्तिम चरणमा रहेको मेलम्ची जलविद्युत आयोजनाको प्रगति ९५ प्रतिशत छ भने गौतम बुद्ध बिमानस्थल ८४ दशमलव २५ प्रतिशत ।
गौतम बुद्ध बिमानस्थल सञ्चालनमा आएसँगै ठूला खालका बिमान ओराल्न काठमाडौको बिमानस्थल नै कुर्नुपर्ने बाध्यता हट्नेछ ।
राजमार्गहरुको प्रगति भने खासै सन्तोषजनक छैन । मध्य पहाडी लोकमार्ग ४२ प्रतिशत काम सकिएको छ भने हुलाकी लोकमार्गको ४३ प्रतिशत ।
समयमै ठेक्का हुन नसक्ने , आयोजनाभित्र पर्ने बिजुलीका पोल हटाउन समयमै
हटाउन नसकिने र जग्गा टुंगो नलाग्ने जस्ता कारणले राष्ट्रिय गौरबका आयोजनाहरुको प्रगति सन्तोषजनक नदेखिएको हो ।
रेलवे तथा मेट्रो विकास आयोजना को प्रगति २० प्रतिशत भएको छ । आर्थिक वर्ष ०६२÷०६३ मा सुरु सिक्टाको अहिलेसम्म प्रगति ६० प्रतिशत छ ।
