चिप्लेढुङ्गा, १८ मङ्सिर (रासस)
पोखरामा भएको १३औँ संस्करणको साग खेलकूदअन्तर्गत आयोजक राष्ट्र नेपालले महिला ह्याण्डबलमा सुखद शुरुआत गरेको छ ।
पोखरा रङ्गशालास्थित बहुउद्देश्यीय कभर्डहलमा भएको महिला ह्याण्डबलको उद्घाटन खेलमा नेपालले श्रीलङ्कामाथि २९–१९ गोलले पराजित गर्दै सुखद शुरुआत गरेको हो । नेपालकोतर्फबाट उमा राईले सर्वाधिक आठ गोल गरिन् । उमाले सबै गोल पेनाल्टीबाट गरेकी हुन् । त्यसपछि कविता राईले ६ गोल गरिन् । त्यस्तै निशा राई र कल्पना वलीले समान चार गोलको योगदान गरे । कप्तान रञ्जना राई र दुर्गा बोहराले समान दुई गोल गरे । बन्दना राई, शान्तिकला राई र रामकुमारी चौधरीले समान एक गोलको योगदान दिए ।
श्रीलङ्काकोतर्फबाट भने रुवानी डीले सर्वाधिक सात गोल गर्न सफल भएकी छिन् । त्यसपछि, नाडे र सासले समान तीन गोलको योगदान दिए । हार्सिका उदय र दिलुक्सी एमले समान दुई गोल गरे । उमासिका र चानिकले समान एक गोलको योगदान दिए ।
विजेता नेपालकोतर्फबाट निशा राईले टोलीका लागि गोलको खाता खोलेकी थिइन् । त्यसपछि कविता राईले टोलीलाई अग्रता दिलाए । श्रीलङ्काकोतर्फबाट भने जयासिङ्घे अराच्चिगेले गोलको खाता खोलेकी थिइन् । लोकुरु वाडुभिडानालागे नाडेले दोस्रो गोल गरेकी थिइन् ।
घरेलु मैदानको फाइदा उठाउँदै घरेलु नेपाली टोलीले विपक्षी श्रीलङ्कालाई खेल अवधिभर पूरै दबाबमा राख्न सफल रह्यो । तुलनात्मकरुपमा नेपाली खेलाडी भन्दा श्रीलङ्कन खेलाडीलाई उचाइमा साथ दिए पनि नेपाली खेलाडीको तीव्र गतिको खेलले सफलता हात लागेको प्रशिक्षक कृष्ण शाक्यले प्रतिक्रिया दिए । टोलीले बनाएको रणनीतिक योजनाअनुसार खेलाडीले खेलेका कारण सफलता हात लागेको प्रशिक्षक शाक्यले प्रतिक्रिया दिए ।
श्रीलङ्कन प्रशिक्षक नेनान्दले नेपाली टोलीलाई बधाई दिए । उनले नेपाली महिला ह्याण्डबल टोलीको खुलेरै प्रशंसा गरे । नेपाल जितको हकदार रहेको उनको प्रतिक्रिया थियो । नेपालको निशा राई र उमा राईलाई रेफ्रीले पहेंलो कार्ड दिए ।
