काठमाडौं, १७ मंसिर
पाँचथर, फालेलुङ गाउँपालिका ४ मेमेङ बस्ने ७० वर्षीया टंकरानी थाम्सुहाङको आगलागीमा परी सोमबार राति मृत्यु भएको छ । घरमा खाना पकाउने क्रममा आगलागी हुँदा थाम्सुहाङको आगोले जलेर मृत्यु भएको बताइएको छ ।
कपिलवस्तु, महाराजगंज नगरपालिका ३ जमुनी बस्ने राजु भुजको घरमा सोमबार राति आगलागी हुँदा करिब १ लाख २७ हजार रुपैयाँ बराबरको धनमाल जलेर नष्ट भएको छ ।
बाँके, बैजनाथ गाउँपालिका १ चिसापानी जुम्ली टोल बस्ने ४३ वर्षीय गणेश बहादुर शाहको कुखुरा पोल्टिफर्ममा ग्याँस सिलिन्डर लिक भई सोमबार राति आगलागी भएको छ । आगलागीबाट पोल्टिफर्म पूर्णरुपमा जलेर नष्ट भएको छ । साथै आगलागी नियन्त्रणमा लिने क्रममा घाइते भएका गणेश बहादुर शाहको मेडिकल कलेज कोहलपुरमा उपचार भइरहेको छ ।
यसैगरी बाँके, नेपालगंज उपमहानगरपालिका १ स्थित सुमित मुराउको मोबाइल पसलमा बिद्युत सर्ट भई मंगलबार बिहान आगलागी हुँदा पसलमा रहेका सम्पूर्ण मोबाइल जलेर नष्ट भएको छ । आगलागीबाट भएको क्षतिको विवरण हाल खुल्न सकेको छैन ।
स्थानीय बासिन्दा तथा दमकलको सहयोगमा आगलागी नियन्त्रणमा लिनुका साथै यस सम्बन्धमा स्थानीय प्रहरीले थप अनुसन्धान गरिरहेको छ ।
