काठमाडौं, १६ मंसिर
नेपाल राष्ट्र बैंकले बैंकहरुलाई चुक्ता पुँजी बढाउन भनेसँगै बैंकहरुले सुरुका वर्षमा न्युन मात्रामा मात्रै नगद लाभांस दिएका थिए । पुँजी पुराएसँगै भने बैंकहरुले बोनस सेयरलाई कम प्राथमिकता दिएका छन् । अहिले उनिहरुको प्राथमिकता नगद लाभांसमा छ ।
अहिले सम्मको लाभांश घोषणा केलाउने हो भने एनएमबि बैंकले सबैभन्दा धेरै २१ प्रतिशत बोनस र १४ प्रतिशत नगद सहित ३५ प्रतिशत लाभांश प्रस्ताव गरेको छ । एनएमबी बैंकपछि नबिल बैंकले १२ प्रतिशत बोनस र २२ प्रतिशत नगद गरी ३४ प्रतिशत लाभांश प्रस्ताव गरेको छ । अहिलेसम्मको बोनस घोषण हेर्दा नबिल बैंक दोस्रो स्थानमा छ ।
ग्लोबल आईएमई, सिद्धार्थ, एभरेष्ट र नेपाल बैंकले २५ प्रतिशत लाभांश प्रस्ताव गरेका छन् । सिभिल बैंक सबैभन्दा कम अर्थात ६.५७ प्रतिशत नगद लाभांश वितरण गर्ने जनाएको छ । जसले गत वर्ष ४.०५ प्रतिशत नगद लाभांश मात्र बाँडेको थियो । यसरी हेर्दा पछिल्ला वर्षमा सिभिल बैकंका लगानीकर्ताले राम्रो लाभांस पाउन सकेका छैनन् ।
गत वर्ष सबैभन्दा बढि लाभांस नेपाल इन्भेष्टमेन्ट बैंकले वितरण गरेको थियो । १८ प्रतिशत बोनस र २२ प्रतिशत नगद गरि कूल ४० प्रतिशत लाभांश वितरण गरेको थियो । विश्लेषकहरु बैंकहरुले प्रदान गरेको यो नाफा सन्तोषजनक नै मान्न पर्छ । गत वर्ष भन्दा बढेको बोनसका कारण सेयर लगानीकर्ता घाटामा नरहेको उनीहरुको बुझाई छ ।
हालसम्म प्रकाशित बैंकहरुको लाभांस विवरण अनुसार बैंकहरुले आफ्ना सेयर लगानीकर्तालाई औसतमा १०.२९ प्रतिशत नगद लाभांश र बोनस सेयर ८.७२ प्रतिशत प्रदान गरेको देखिन्छ । कुल जोड्दा बैंकहरुले औसतमा १९.०१ प्रतिशत लाभांश वितरण गरेको देखिन्छ । यसरी हेर्दा वाणिज्य बैंकहरुले प्रदान गर्ने लाभांस ३.७१ प्रतिशतले बढेको देखिन्छ ।
गत वर्ष भने बैंकहरुले अघिल्लो आर्थिक वर्ष २०७४/७५ को नाफाबाट औसतमा १५.३० प्रतिशत लाभांश दिने घोषणा गरेका थिए । जसमा बोनस सेयर ६.२१ र नगद लाभांशको ९.०९ प्रतिशत रहेको देखिन्छ ।
