–रमेश गिरी भक्तपुर, १४ मङ्सिर (रासस)
जारी उपनिर्वाचनका क्रममा निर्वाचन आयोगका प्रमुख आयुक्त दिनेशकुमार थपलियाले मतदान केन्द्रदेखि मतगणनास्थलसम्मको अनुगमन गर्नुभएको छ । भक्तपुर क्षेत्र नं १ प्रदेशसभा (क) को उपनिर्वाचनमा अनुगमनका क्रममा उहाँले चाँगुनारायण नगरपालिका–२ दुवाकोट वडा कार्यालयको मतदान केन्द्र, ३ झौखेल वडा कार्यालयको मतदान केन्द्र, भक्तपुर नगरपालिका–१० को सरस्वती विद्यागृहको मतदान केन्द्रको अवलोकन गर्नुभएको हो ।
प्रमुख आयुक्त थपलियाले खरिपाटीस्थित नेपाल विद्युत् प्राधिकरणको मतगणनास्थलको पनि अनुगमन गर्नुभयो । अनुगमनपछि उहाँले शान्तिपूर्ण रुपमा उपनिर्वाचन शुरु भएको र मतदाताको उत्साह देखेर आफू खुशी भएको बताउनुभयो । उहाँले प्रजिअ नारायणप्रसाद भट्ट, मुख्य निर्वाचन अधिकृत जगतनारायण प्रधानलाई मतदानमा सुरक्षा व्यवस्था मजबुद पाइएकाले मतगणना आजैदेखि शुरु गर्न निर्देशन दिनुभयो । उहाँले भन्नुभयो, “मतगणना आजैबाट शुरु गर्नुस र नजिता छिटो दिनुपर्छ ।”
भक्तपुरका सबै मतदान केन्द्रमा उत्साहजनक रुपमा मतदान जारीे छ । बिहानभन्दा मध्याह्नपछि मतदान गर्न मतदाताको उत्साहजनक सहभागिता रहेको छ । मतदान गर्न मतदाताको उत्साहजनक सहभागिता छ । प्रदेश (क)मा चाँगुनारायण नगरपालिकाको नौवटा र भक्तपुर नगरपालिका–१० मा गरी १० वटा वडामा कूल २२ मतदानस्थलका र ५४ मतदान केन्द्रमा शान्तिपूर्ण रुपमा मतदान भइरहेको मुख्य निर्वाचन अधिकृतको कार्यालयले जानकारी दिएको छ । भक्तपुुरमा अहिलेसम्म ४० प्रतिशत मत खसेको कार्यालयले जनाएको छ ।
कूल २१ हजार ९३५ पुरुष र २३ हजार ८० महिला गरी कूल ४५ हजार १५ मतदाता रहेको यो प्रदेशसभा सदस्य क्षेत्रमा बिहानैदेखि उत्साहजनक रुपमा मतदाता लामबद्ध भएका छन् । उपनिर्वाचनका लागि नौ दलका नौ उम्मेदवार र १० स्वतन्त्र उम्मदेवार गरी कूल १९ जना चुनावी मैदानमा छन् ।
नगरकोट वडा कार्यालयको मतदान केन्द्रमा बिहान ६ बजेदेखि नै मतदाता आएको र मध्याह्नसम्म उत्साहजनक रुपमा मतदान भइरहेको स्थानीयवासी सोम शर्मा बजगार्इंले जानकारी दिनुभयो । श्रीकृष्ण मावि खरिपाटीमा भने बिहान १० बजेसम्म न्यून सङ्ख्यामा मतदाता आए पनि ११ बजेपछि भने मतदाताको सङ्ख्या बढेको स्थानीयवासी मनोज गिरीले जानकारी दिनुभयो । बिहान चिसोका कारण र काममा जानेहरुका कारण मतदाता कम आए पनि दिउँसो भने उत्साहजनक रुपमा मतदाताहरुको सहभागिता रहेको उहाँले जानकारी दिनुभयो ।
चाँगुनारायण नगरपालिकाको ताथलीस्थित गणेश मावि मतदान केन्द्रमा पनि बिहानदेखि उत्साहजनक रुपमा मतदान भइरहेको छ । मतदाताको उल्लेख्य रुपमा सहभागिता रहेको यस केन्द्रमा ११ बजेसम्म एक चौथाइ मतदान भइसकेको स्थानीयवासी सुवास ढुङ्गानाले जानकारी दिनुभयो । उम्मेदवारमध्ये नेकपाका उम्मेदवार डिपी ढकालले बिहान ७ः३० बजे भक्तपुर नगरपालिका १० सरस्वती विद्यागृहको मतदान केन्द्रमा मतदान गर्नुभयो भने नेपाली काँग्रेसका उम्मेदवार कृष्णलाल भँडेलले ११ बजे चाँगुनारायण मावि मतदान केन्द्रमा मतदान गर्नुभयो ।
उम्मेदवार नै मतदानबाट वञ्चित नेमकिपाका उम्मेदवार नीरज लवजूले भने आफैँलाई मतदान गर्न पाउनु भएन । भक्तपुर नगरपालिका–९ मा मतदाता नामावली रहेकाले उहाँले आफैँलाई मतदान गर्न नपाएको बताउनुभयो । लजवूले अधिकांश मतदान केन्द्रको अनुगमनमा उत्साहजनक रुपमा मतदाताको सहभागिता रहेको र शान्तिपूर्ण रुपमा मतदान भइरहेकामा खुशी व्यक्त गर्नुभयो ।
नेकपाका उम्मेदवार ढकालले आफूले मतदान गरेको मतदान केन्द्रलगायत आफूले अनुगमन गरेका सबै मतदान केन्द्र शान्तिपूर्ण र सौहाद्र्रपूर्ण रुपमा मतदान भइरहेकामा सन्तुष्ट व्यक्त गर्नुभयो । उपनिर्वाचनमा मतदाताको उत्साह देखेर आफूलाई पनि थप उत्साह बढेको उहाँले जानकारी दिनुभयो । काँग्रेसका उम्मेदवार भँडेलले मतदान गर्दै शहर र शान्तिपूर्ण रुपमा मतदान हुनु खुशीको कुरा रहेको बताउनुभयो । यहाँका प्रत्येक मतदान केन्द्र सुरक्षित रहेको आफूले पाएको र मतदाताहरु पनि निर्धक्क भएर शान्तिपूर्ण रुपमा मतदानस्थलमा आएको बताउनुभयो ।
