काठमाडौं, २४ कात्तिक
सरकारले ऋण उठाउनका लागि वैदेशिक रोजगार बचतपत्र जारी गर्ने गर्छ । तर बिगत डेढ वर्ष देखि भने सरकारले यो औजारको प्रयोग गर्न नै छाडेको छ । आन्तरिक ऋण उठाउनका लागि जारी गरिने यो औजार असफल हुनुमा सरकारको प्रचारप्रसारको अभाव भएको विज्ञहरु बताउँछन् । विकास निर्माणका लागि आवश्यक पर्ने पुँजी यसबाट जुटाउने उद्देश्यले जारी भएको यो औजार अहिले प्रंभावहिन भएको छ।
९ वर्षमा सरकारले ११ अर्ब ८ करोडको वैदेशिक रोजगार बचतपत्र जारी गर्याे । त्यसमध्ये अहिलेसम्म ५८ करोड मात्रै बिक्री भएको छ । जुन कुल रकमको जम्मा ५ प्रतिशत मात्रै हो । सुरुका तीन वर्षमा त यस्तो बचतपत्र १ प्रतिशत पनि बिक्री हुन सकेन । त्यसपछि राष्ट्र बैंक र सरकारले यसमा केहि प्रचारप्रसार पनि गर्याे । तर यसको नतिजा अहिलेसम्म पनि राम्रो देखिएको छैन । सरकारले २०६७ सालदेखि वैदेशिक रोजगार बचतपत्र जारी गर्न सुरु गरेको थियो ।
बचतपत्रको ब्याज १० प्रतिशतको हाराहारीमा हुने गरेको छ । यो ब्याजदर बैंकहरुको मुद्दति निक्षेपमा पाइने ब्याज भन्दा केहि बढि भएपनि सहकारीमा पाइने ब्याज भन्दा भने न्युन हो । जसका कारण पनि वैदेशिक रोजगारीमा गएकाले यसमा लगानी नगरेका हुन् ।
विदेशमा गएका कामदारहरुले विभिन्न रेमिट्यान्स कम्पनीका एजेन्टमार्फत वैदेशिक रोजगार बचतपत्र खरिद गर्न सक्छन् । साथै विदेशमा रहेको नेपालीको परिवारले कामदारको पासपोर्टको प्रतिलिपि प्रयोग गरे नेपालबाटै पनि यो खरिद गर्न सकिन्छ । गत वर्षदेखि रेमिट्यान्सको बृद्धिदर पनि घट्दै गएको छ ।
