नुवाकोट, १६ कात्तिक
धारिलो हतियार खुर्पा प्रहार गरी हत्या गरेको अभियोगमा बेलकोटगढी नगरपालिका-१२ देउराली लामाटोल बस्ने ककनी गाउँपालिका-३ चाउथे घर भएकी २८ वर्षीया पार्वती राना मगरलाई शुक्रबार दिउँसो प्रहरीले पक्राउ गरेको छ ।

बेलकोटगढी नगरपालिका-१२ देउराली लामाटोलस्थित माईतीघरमा बस्दै आएकी पार्वतीले आफ्नै भाइ नवराज रानामगरको छोरा ३ वर्षीय सुजन रानामगरलाई खुर्पा प्रहार गर्दा घटनास्थलमै मृत्यु भएको थियो । जिल्ला प्रहरी कार्यालय नुवाकोट र प्रहरी चौकी तादिपुलबाट खटिएको प्रहरी टोलीले पार्वतीलाई सोही स्थानमा रहेको जंगलमा लुकेर बसेको अवस्थामा फेला पारी पक्राउ गरेको हो ।

यस सम्बन्धमा प्रहरीले आवश्यक अनुसन्धान गरिरहेको छ ।