रसना ढकाल
काठमाडौँ, २७ असार
चार महिना देखी कुवेतमा अलपत्र अवस्थामा परेकी आफनो आमाको सकुशल नेपाल झिकाइ पाउँ भन्दै एक छोरीले महिला मन्त्रालय गुहारेकी छिन् । घरेलु कामदारको रुपमा भारतको बाटो हुदै कुवेत पुगेकी नुवाकोटकी ३४ वर्षीय अनु तामाङ्गकी छोरी सलिना तामाङ्गले महिला , बालबालिका तथा जेष्ठ नागरिक मन्त्रालय अन्तर्गत महिला सशक्तिकरण महाशाखामा सह सचिव रुद्रा देवी शर्मा समक्ष आमाको उद्दारको लागि माग गरेकी हुन् ।
सलिना तामाङ्गका अनुसार चैत्रको पहिलो हप्ता भारतको दिल्लीबाट रमेश खत्री नाम गरेको एजेण्ट मार्फत आमा अनु कुवेत पुगेको र पुगेपछि दुई महिनासम्म परिवारको सम्पर्कमा नआएको बताइन् । दुई महिनासम्म आमा सम्पर्कमा नआएपछि विचलित बनेकी छोरीलाई अचानक केही दिन अघि आमाले रुँदै भिडियो कल गरेको र जतिसक्दो चाडो नेपाल झिकाई दिउ भनेको छोरीले बताएकी छिन् ।
यता अनु तामाङ्गलाइ चिन्दै आउनु भएका सञ्चारकर्मी जि.बि.आग्रीलाइ पनि अनुले भिडियो कल गरेर नेपाल झिकाउन आग्रह गरेको आग्रीले बताउनु भएको छ । आग्रीका अनुसार भारतका एजेण्ट रमेश खत्रीले उल्टै परिवारसँग पैसा मागेको र कुवेत स्थित रीता राइ नाम बताउने महिला एजेण्टले अफिस खोलेकी र उनले पनि अनुलाइ नेपाल झिकाउ परिवार समक्ष लाखौँ रुपैयाँको माग गरेको बताउनुभयो ।
अनुलाई सकुशल नेपाल झिकाउनको लागि महिला, बालबालिका तथा जेष्ठ नागरिक मन्त्रालयकी सहसचिव रुद्रा देवी शर्माले पराष्ट्र मन्त्रालय अन्तर्गतको काउन्सर विभागमा सम्पर्क गरेको र काउन्सर विभागले कुवेत स्थित राजदुतावासमा जानकारी दिइ सकेको बताउनुभयो । साथै अनुलाइ सकुशल झिकाउन मन्त्रालयबाट पूर्ण सहयोग गर्ने सह सचिव शर्माले बताउनुभयाे ।
सलिनाका अनुसार आमाको उद्दारको लागि परराष्ट्र मन्त्रालय र नेपाल प्रहरीको मानव बेचविखन अनुसन्धान व्युरोमा असार १५ गते निवेदन दिएकि थिइन् । अहिलेसम्म केहि जानकारी नआएपछि उनी विहीवार केआइ नेपाल , विश्वास नेपाल, महिलाको निम्ति महिला मञ्च नेपाल र सञ्चार माध्यमको सहयोगमा महिला मन्त्रालय पुगेकी हुन् ।
