काठमाडौं, पुस १३
मूर्तिकार तथा नेपाल ललितकला प्रज्ञा प्रतिष्ठानका पूर्वउपकुलपति ठाकुरप्रसाद मैनालीद्वारा लिखित तथा सङ्कलित ‘कलाका कुरा’ तथा ‘मेरो कामना’ एवं ‘सिर्जना र विवेचना’ नामक तीन कृति विमोचन भएको छ ।
नेपाल ललितकला प्रज्ञा–प्रतिष्ठान, मूर्तिकला विभाग र नेपाली समसामयिक मूर्तिकारहरूको समूह (आरम्भ) को संयुक्त आयोजनामा उक्त पुस्तकलाई प्रतिष्ठानका कुलपति नारदमणि हार्तम्छाली, उपकुलपति लालकाजी लामा, सदस्य सचिव देवेन्द्रकुमार काफ्ले ‘थुम्केली’, प्राज्ञ रमेश खनाल र ज्ञानेन्द्र विवश लगायतले आज सार्वजनिक गरेका हुन् ।
प्रतिष्ठानका प्राज्ञसभा सदस्य नरेन्द्रप्रसाद भण्डारीले लेखक मैनाली नेपाली आधुनिक मूर्तिकला क्षेत्रका विशिष्ट प्रतिभा रहेका भनाइ राखे । उनले भने, “उहाँ आधुनिक मूर्तिकलाको रत्न हुनुहुन्छ ।”
लेखक तथा प्राज्ञ ज्ञानेन्द्र विवशले ठाकुरप्रसाद मैनाली समग्र नेपाली कलाको दस्तावेजको भएका धारणा राखे । उनले भने, “यस कृतिलाई कलाकार तथा विद्यार्थीले सन्दर्भ सामाग्रीको रूपमा लिने छन् ।”
प्रतिष्ठानका कुलपति हार्तम्छालीले कृतिकार मैनाली जिउँदो सम्पदा रहेको दाबी गरे ।
उपकुलपति लामाले मैनालीले विविध पाटोमा काम गर्न सकिन्छ भनेर पुस्तक मार्फत सन्देश दिएका धारणा राखे ।
उक्त अवसरमा बोल्दै लेखक मैनालीले आफूले भन्नुपर्ने सबैकुरा पुस्तक मै भएको जानकारी गराउँदै पुस्तक लोकार्पण गरिदिएकामा प्रतिष्ठान एवं उपस्थित सम्पूर्ण व्यक्तिलाई धन्यवाद ज्ञापन गरे ।
मूर्तिकला विभाग प्रमुख दिनेश्वर महतोले सार्वजनिक पुस्तकहरू वास्तवमै कला तथा इतिहासका दस्तावेज भएको भनाइ राखे ।
