काठमाडौं, कार्तिक १४
यसै वर्षको संविधान दिवसदेखि सञ्चालनमा आएको रत्नपार्क-सूर्यविनायक द्रुत बस सेवा हाल रोकिएको छ । दसैँपछि रोकिएको रत्नपार्क-सूर्यविनायक द्रुत बस सेवा तिहार पछि पुनः सञ्चालनमा आउने भएको छ ।
सेवा सञ्चालनका क्रममा प्राविधिक र व्यवस्थापकीय पक्षमा देखिएका समस्याको हल गर्दै तिहार बिदा सकिएलगतै पुनःसञ्चालनमा ल्याउन लागिएको भौतिक पूर्वाधार तथा यातायात मन्त्रालयले जनाएको छ ।
४० मिनटेमा यात्रा यात्रा पूरा गर्न सक्ने गरी सुरुमा परीक्षणका रूपमा रत्नपार्कदेखि सूर्यविनायक रुटमा द्रुत बस सेवा सुरु गरिएको थियो । उद्घाटनअघि दुई–चार दिनभित्र सडकमा लाइन र रङ पोतेर द्रुत बस सेवाका निम्ति लेन छुट्ट्याइएको थियो ।
बिहान ९ देखि ११ र अपराह्न ४ देखि ६ बजेसम्म चलाइने भनिएका २५ द्रुत सेवाका बसका निम्ति लेन खाली गर्न खोज्दा जाम चर्किएपछि आलोचना हुन थालेको थियो .
द्रुत बस सेवा सञ्चालनका निम्ति काठमाडौं सडक डिभिजनअन्तर्गत सूर्यविनायक–धुलिखेल आयोजनामार्फत काम गरिएको थियो । सडक डिभिजन काठमाडौंका प्रमुख नारायणदत्त भण्डारीले द्रुत बस सेवा सञ्चालनमा करिब दुई करोड रुपैयाँ खर्च भएको बताए ।
द्रुत बस सेवा सञ्चालनका निम्ति नेपाल यातायात व्यवसायी राष्ट्रिय महासंघले २५ गाडी उपलब्ध गराएको थियो ।
