ललितपुर, असोज २४
चाडपर्व नजिँदै जाँदा चापागाउँ प्रहरी वृत्तले विशेष सुरक्षा रणनीति बनाएको छ। दशैं, तिहार, छठ जस्ता चाडपर्व नजिकिएसँगै अपराध नियन्त्रण गर्न चाडपर्वलाई लक्षित गरी सुरक्षा सक्रियता र निगरानी बढाएको हो ।
चाडपर्व हुन सक्ने चोरी, लुटपाट लगायत विभिन्न आपराधिक गतिविधिलाई मध्यनजर गर्दै सुरक्षा योजना तयार पारेको छ। विगतका चाडपर्वमा भएका अवाक्षनीय अपराधिक गतिविधि, चोरी, हत्या र सवारी दुर्घटनालाई मध्यनजर गर्दै तयार पारिएको सुरक्षा योजना प्रभावकारी रूपमा कार्यान्वयनतर्फ लैजान थालिएको चापागाउँका प्रहरी निरीक्षक गम्भिर जंग थापाले बताए।
प्रहरी निरीक्षक गम्भिर जंग थापाको कमान्डमा ५ जना प्रहरीका साथ गोदावरी नगरपालिकाका वडा नं. ५, ६, ७, १०, ११, १२, १३ र ललितपुर महानगरपालिकाका वडा नं. २६ र २७ स्थित धापाखेल, चिवाहल, सुनाकोठी, ट्याक्सी पार्क, लेले, बज्रबाराही, ठेचो, प्याङगाउँमा नजिकिँदै गरेका चाडपर्वमा हुनसक्ने सम्भावित घटनाहरूलाई लक्षित गरी जनचेतनामूलक माईकिङ तथा पर्चा बितरण कार्यक्रम गरिएको छ ।
प्रायः घटनामा चिनेजानेका तथा आफन्तबाट नै भएको देखिएको चापागाउँ प्रहरी वृत्तका प्रमुख प्रहरी नायब उपरीक्षक कृष्ण कुमार चन्दले बताए । प्रहरी नायब उपरीक्षक कृष्ण कुमार चन्दले हालको परिस्थितिमा धेरैजसो व्यक्तिसँग स्मार्ट फोन रहेको हुँदा सामाजिक सञ्जालमा अश्लिल भिडियो हेरी घटनामा संलग्न हुने भएकोले अनावश्यक रुपमा फेसबुकमा पोष्ट नगर्न र आफ्नो सुरक्षा आफै गर्न अनुरोध गरे ।
अवाक्षनीय अपराधिक गतिविधि नियन्त्रण तथा प्रभावकारी बनाउनका लागि प्रत्येक वडमा यस्ता जनचेतनामूलक कार्यक्रमलाई निरन्तरता दिने चापागाउँ प्रहरी वृत्तले जानकारी दिए । चाडपर्वलाई लक्षित गरी सुरक्षा सक्रियता र निगरानीका लागि प्रहरी टोली बढी खटाएको चापागाउँ प्रहरीले बताए ।
