ललितपुर, भदौ २७
ललितपुर उद्योग वाणिज्य संघको अध्यक्षका लागि उम्मेदवार रूपकमान महर्जनको व्यापक चर्चा भएको छ । महर्जन ललितपुर खाद्य व्यापार संघको अध्यक्ष समेत हुन् । खस्कँदो हस्तकला व्यवशायलाई माथि उठाउने तथा पर्यटन प्रवर्द्धन गर्ने मुद्दा लिएर रुपकमान महर्जन अध्यक्ष पदमा प्यानलसहित चुनावी मैदानमा होमिएका छन् ।
महर्जनले खस्कँदो हस्तकला व्यवशायलाइ माथि उठाउन, पर्यटन प्रवर्द्धन गर्न र २९ वटै वस्तुगत संघका सरोकारका बिषयहरु उठाउन पहल गर्ने बताए । उनले यस क्षेत्रमा रहेका २०० भन्दा बढी टेक्सटाइल उद्योगको व्यापार प्रवर्द्धन गर्न ठोस कदम चाल्ने प्रतिवद्धता व्यक्त गरेका छन् ।
यसैगरी ललितपुरको दक्षिणी भागमा कृषी उद्दमको प्रचुर सम्भावना हुँदाहुँदै पनि यस क्षेत्रका बासिन्दाले लाभ लिन नसकेको कटु यथार्थबारे आफु चिन्तित रहेको बताउँदै कृषिको विविधिकरण र व्यवाशायीकरणद्वारा यो क्षेत्रको आर्थिक सबलीकरणमा आफु पूर्ण रुपमा लागिपर्ने बताए ।
देशकै पुरानो वाणिज्य संघको आसन्न ४४औं साधारण सभाले नयाँ नेतृत्व चयन गर्नेछ । असोज १९ गते शंखमुलस्थित यल दरबारमा संघको साधारण सभा र २० गते स्टाफ कलेज, जावलाखेलमा निर्वाचन हुने कार्यक्रम रहेको छ ।
