विराटनगर १३ भदौ
नेकपा एमालेका अध्यक्ष केपी शर्मा ओलीले अमेरिकी सहयोग परियोजना मिलेनियम च्यालेन्ज कर्पोरेसन (एमसीसी) पास गर्ने बेला गरिएको १२ बुँदे व्याख्यात्मक घोषणा झुटको खेस्रा मात्र भएको बताएका छन् । एमसीसी सम्झौताबारे नेपालमा गरिएको १२ बुँदे व्याख्यात्मक घोषणाको अर्थ नरहेको उनको तर्क छ ।
आज विराटनगर विमानस्थलमा सञ्चारकर्मीसँग कुरा गर्दै प्रमुख प्रतिपक्षी दल एमालेका अध्यक्ष ओलीले संसदबाट पारित भइसकेकाले एमसीसी कार्यान्वयनमा जाने वताएका हुन् । संसदबाट पारित गर्नु उपयुक्त हो होइन भनेर त्यसबेला सोच्नुपर्ने भन्दै सदनबाट पारित भइसकेकाले एमसीसी कार्यान्वयनमा दुविधा नरहेको बताए ।
आज अर्थमन्त्री डा। प्रकाशशरण महत र एमसीसीका उपाध्यक्ष क्यामरुन अलफोर्डबीच ‘लेटर अफ एक्सचेन्ज’ भएसँगै एमसीसी कार्यान्वयनमा जानेछ ।
एमसीसीमार्फत अमेरिकाले नेपालमा ५० करोड अमेरिकी डलरको अनुदान सहयोग दिएको छ। यसमा नेपालले १३ करोड डलर थप गरेको छ।
