काठमाडौं ७ भदौ
बारामा तीर्थयात्री सवार बस दुर्घटनामा घाइते भएका एकजनाको उपचारका क्रममा मृत्यु भएको छ । योसँगै उक्त दुर्घटनामा परी ज्यान गुमाउनेको संख्या सात पुगेको छ ।
तीनजनाको घटनास्थलमा तथा चारको उपचारका क्रममा मृत्यु भएको बाराका प्रहरी प्रवक्ता एवं प्रहरी नायब उपरीक्षक दधिराम न्यौपानेले जानकारी दिए ।
काठमाडौँबाट जनकपुरतर्फ जाँदै गरेको मधेस प्रदेश ३००१ ख ७९९४ नम्बरको बस आज बिहान २ बजे बाराको जितपुर सिमरा उपमहानगरपालिका–२२ स्थित पूर्वपश्चिम लोकराजमार्गको चुरियामाईनजिक दुर्घटना भएको हो ।
मृत्यु हुनेमा महोत्तरीको लोहारपट्टीका ४१ वर्षीय विजयलाल पण्डित, भारतको राजस्थानका ६७ वर्षीय बहादुर सिंह र ६५ वर्षीया मीरादेवी सिंह रहेका डीएसपी न्यौपानेले बताए । बाँकी चारजनाको सनाखत हुन बाँकी छ ।
दुर्घटनामा तीन नेपाली र १४ भारतीय नागरिक घाइते भएका छन् । उनीहरू पशुपतिनाथको दर्शन गरी फर्कंदै थिए ।
