ललितपुर, साउन २२
आगामी भदौ २१ गतेदेखि पाँचौं खुल्ला राष्ट्रिय किकबक्सिङ्ग प्रतियोगिता हुने भएको छ । ललितपुर किकबक्सिङ संघ र ललितपुर जिल्ला खेलकुद विकास समितिको आयोजनामा हुँदै आएको स्व. वीर गणेशमान स्मृति खुल्ला राष्ट्रिय किकबक्सिङ प्रतियोगिता हुन लागेको ललितपुर जिल्ला खेलकुद विकास समितिका अध्यक्ष विनोद महर्जनले बताएका छन् ।
गोदावरी नगरपालिकाको मुख्य प्रायोजन रहने प्रतियोगितामाको कुल अनुमानित बजेट ५२ लाख ८१ हजार ६ सय रुपैयाँ रहेको छ । प्रतियोगिता भदौ २१ देखि २३ सम्म गोदावरी नगरपालिका ११ स्थित प्याङ्गाउँ खेल मैदानमा हुनेछ ।
प्रतियोगितामा पुरुष र महिलातर्फ ६-६ तौल समूहमा प्रतिस्पर्धा हुनेछ । पुरुषमा ५०, ५५, ६०, ६५, ७५ र खुल्ला तथा महिलामा ४५, ५०, ५५, ६०, ६५ र खुल्ला तौल समूहमा प्रतिस्पर्धा हुनेछ ।
टिम च्याम्पियन बन्ने टोलीलाई १ लाख, दोस्रो हुनेलाई ५० हजार र तेस्रो हुने टिमलाई २५ हजार प्रदान गरिनेछ । पुरुष र महिला दुवै विधातर्फ उत्कृष्ट हुने खेलाडीले जनही २५-२५ हजार रुपैयाँ पाउनेछन् ।
