आधारभूमि संवाददाता
काठमाडौं, बैशाख १८
रियल मड्रिडले स्पेनिस ला लिगाको उपाधि जितेको छ । शनिबार राति लिग अन्तरगत भएको खेलमा स्पानियोललाई ४-० ले पराजित गर्दै रियल मड्रिडले चार खेल बाँकी छँदा नै उपाधि जितेको हो।
रियल मड्रिडको जितमा रोड्रिगोले दुई गोल गरे भने मार्को एसेन्सियो र करिम बेन्जामाले एक-एक गोल गरेका थिए।
खेलको ३३ औँ मिनेटमा रोड्रिगोले गोल गर्दै रियल मड्रिडलाई सुरुवाती अग्रता दिलाएका थिए ।
खेलको ४३ औ मिनेटमा रोड्रिगोले व्यक्तिगत दोस्रो गोल गर्दै टोलीको अग्रता दोब्बर पारे ।
दोस्रो हाफको ५५ औं मिनेटमा मार्को एसेन्सियोले गोल गर्दै टोलीलाई ३-० ले अघि बढाए।
त्यसपछि खेलको ८१ औं मिनेटमा बेन्जामाले गोल गर्दै टोलीलाई ४-० को जित दिलाए ।
यससंगै रियल मड्रिडले ३५ औं पटक स्पेनिस ला लिगा फुटबलको उपाधि जितेको छ ।
रियल मड्रिडले दोस्रो स्थानको सेभियासँग १७ अंकको अग्रता बनाउदै यस सिजनको स्पेनिस ला लिगा फुटबलको उपाधि जितेको छ । रियल मड्रिडको ३४ खेलबाट ८१ अंक छ । समान खेल खेलेको सेभियाको ६४ अंक छ र लिगको दोस्रो स्थान । तेश्रो स्थानमा रहेको बार्सिलोनाको ३३ खेलबाट ६३ अंक छ। पराजित स्पानियोलको ३४ खेलबाट ३९ अंक छ र १३ औं स्थानमा रहेको छ ।
