आधारभूमि संवाददाता
काठमाडौँ, २१ चैत
फ्रेन्च लिग वान फुटबलमा शीर्ष स्थानको पेरिस सेन्ट जर्मेन (पीएसजी)ले १२ अंकको अग्रता बनाएको छ । आइतबार राति घरेलु मैदानमा भएको खेलमा पीएसजीले लोरियन्टलाई ५-१ गोलले पराजित गरेको हो ।
घरेलु मैदानमा पीएसजीलाई जित दिलाउन नेमार र केलियन एमबाप्पे दुई-दुई गोल गरे भने लिओनेल मेस्सीले एक गोल गरे।लोरियन्टका तेरेम मोफीले एक गोल गरे।
खेलको १२ औं मिनेटमा नेमारले गोल गर्दै टोलीलाई सुरुवाती अग्रता दिलाएका थिए ।
खेलको २८ औं मिनेटमा एमबाप्पेले गोल गर्दै पीएसजीलाई २-० ले अघि बढाए ।
दोस्रो हाफको ५६ औं मिनेटमा लोरियन्टका तेरेम मोफीले गोल गर्दै खेल २-१ को स्थितिमा ल्याए ।
तर,६७ औं मिनेटमा एमबाप्पेले व्यक्तिगत दोस्रो गोल गर्दै पीएसजीलाई ३-१ ले अघि बढाए ।
खेलको ७३ औं मिनेटमा लिओनेल मेस्सीले गोल गर्दै पीएसजीलाई ४-१ ले अघि बढाए ।
त्यसपछि खेलको ९० औं मिनेटमा नेमारले व्यक्तिगत दोस्रो गोल गर्दै टोलीलाई ५-१ को जित दिलाए ।
जितसंगै पीएसजीले ३० खेलबाट ६८ अंक जोडेको छ र शीर्ष स्थानमा १२ अंकको अग्रता बनाएको छ ।पराजित लोरियन्टको ३० खेलबाट २८ अंक छ र १६ औं स्थानमा छ ।