आधारभूमि संवाददाता
काठमाडौं, चैत ३०
विदेशमा कामजानेहरु घट्दा पनि रेमिट्यान्स भने बढेको देखिएको छ । अझ महामारी लागि पछि कैयन युवाहरु काम छाडेर नेपाल आएका छन् । यसका बाबजुद पनि नेपालमा रेमिट्यान्स भने करिब १० दशमलव नौ प्रतिशतले बढेको छ ।
विदेशमा कामको खोजिमा गएकाहरुले महामारी सुरु भएसँगै त्यहाँ गर्ने अन्य खर्चमा कटौति गरेका छन् । मनोरञ्जनका लागि उनिहरुले खर्च गर्न छाडेका छन् । महामारीका कारण भोलिका दिनमा फेरी के होला भन्ने उनिहरुमा भय छ । यहि भयका कारण उनिहरुले पैसा खर्च नगरि राखेका छन् । जसका कारण रेमिट्यान्समा बढोत्तरी भएको छ।
यसरी खर्च नगरि राखेको पैसा उनिहरुले नेपालमा बालबच्चाको पढाइका साथै आगामी दिनमा आउने समस्या समाधान गर्नका लागि नेपालमा पठाएका छन् । जसका कारण रेमिट््यान्स बढेको हो ।
नेपाल राष्ट्र बैंकका अनुसार माघ मसान्तसम्मा रेमिट्यान्स १०.९ प्रतिशतले वृद्धि भई ५ खर्ब ६७ अर्ब ७० करोड पुगेको छ । अघिल्लो वर्षको सोही अवधिमा विप्रेषण आप्रवाह ०.७ प्रतिशतले घटेको थियो ।
त्यसैगरि अमेरिकी डलरमा विप्रेषण आप्रवाह ६.७ प्रतिशतले वृद्धि भई ४ अर्ब ८१ करोड पुगेको छ । अघिल्लो वर्ष यस्तो आप्रवाह ०.५ प्रतिशतले घटेको थियो ।
यता माघ मसान्तसम्म वैदेशिक रोजगारीका लागि अन्तिम श्रम स्वीकृति (संस्थागत तथा व्यक्तिगत–नयाँ र वैधानिकीकरण) लिने नेपालीको संख्या ७५.९ प्रतिशतले घटेको छ । जबकी अघिल्लो वर्षको सोही अवधिमा यस्तो संख्या २१.७ प्रतिशतले बढेको थियो ।
वैदेशिक रोजगारीका लागि पुनः श्रम स्वीकृति लिने नेपालीको संख्या माघमसान्तसम्म ६७.४ प्रतिशतले घटेको छ । अघिल्लो वर्षको सोही अवधिमा यस्तो संख्या ०.६ प्रतिशतले घटेको थियो ।
बैदेशिक रोजगारीबाट आएको रकमले शिक्षा तथा स्वास्थ्य मात्रै होइन यसले गरिबि घटाउन पनि मद्दत गरेको छ । तर सरकारले यस्तो रकम उत्पादनमुलक काममा भने लगाउन सकेको छैन । जसका कारण बाहिरबाट आयात भने बढिरहेको छ।
रेमिट्यान्स देशको उत्पादनमुलक काममा लगाउन सके र निर्यात बढाउन सकेमात्रै भोलिका दिनमा बिदेशीएका युवाले नेपालमा आएर काम गर्न सक्छन् । र उनिहरु कामको खोजिमा फेरी बिदेश जानु पर्दैन । तर रेमिट्यान्स आयात र उपभोगमा खर्चने हो भने युवा बिदेशीने क्रम निरन्तर चलिनै रहनेछ ।