आधारभूमि संवाददाता
काठमाडौं, चैत १७
अन्तराष्ट्रिय बजारमा कच्चा तेलको मूल्य बढेको भन्दै तेल उद्योगीहरुले तेलको मूल्य अस्वाभाविक रुपमा बढाएका छन् । गएको एक वर्षमा तेलको मूल्य एक लिटरमा नै ८० रुपैयाँ सम्म बढेको छ ।
अस्वभाविक रुपमा भाउ बढाउने यस्ता दुई वटा तेल उद्योगीलाई सरकारले कार्वाहि गरेपनि यो रोकिएको छैन ।गत वर्षको चैतमा भटमासको तेलको मूल्य १ सय ५० रुपैयाँ प्रतिलिटर थियो । जुन गत दशैमा केहि महंगीएर १ सय ७५ पुग्यो । त्यसपछि भने तेल उद्योगीले अन्तर्राष्ट्रिय बजारमा कच्चा तेलको मूल्य बढेको भन्दै माघसम्म आउँदा प्रतिलिटर २ सय २५ पुराए ।
अस्वााभाविक रुपमा भाउ बढेको भन्ने गुनासो आएपछि सरकारले अनुगमन थाल्यो । यसैबिचमा भारतले पनि आफ्नो देशमा भटमासको कच्चा तेलको आयात बढ्यो । जसका कारण भारत जाने भटमासको तेलमा केहि कमिसँगै सरकारको नियमनका कारण फेरी मूल्य घटेर गत फागुन अन्त्यसम्म प्रतिलिटर २ सय १० सम्म झर्याे । तर अहिले फेरी बढेर यो प्रतिलिटर दुई सय तीस सम्म पुगेको छ ।
बढेको तेलको मूल्यमा अहिले खुद्रा ब्यापारीले बिल समेत पाउन नसकेको गुनासो गर्छन् । थोक ब्यापारीले अहिले एक कार्टुन अर्थात १० लिटरलाई २१ सय रुपैयाँमा बेच्ने तर १९ सयको मात्रै बिल दिने गरेको खुद्रा ब्यापारी बताउँछन् ।
चर्काे मूल्य असुलेको गुनासो आएपछि सरकारले उद्योगमाथि अनुगमन नगरेको पनि होइन । गत माघ ५ गते अप्राकृतिक रुपमा तेलको मूल्य कायम गरेको भन्दै बाणिज्य आपूर्ति तथा उपभोक्ता हित संरक्षण विभागले बारा जिल्लाको अन्नपुर्ण भेजिटेबल प्राली र महालक्ष्मी सोल्भेन्ट एण्ड रिफाइनरी प्रालीलाई उपभोक्ता हित संरक्षण ऐन बिरुद्ध हुने गरि अप्राकृतिक रुपमा मूल्यबृद्धि गरेको भन्दै ३ लाख रुपैयाँ जरिवाना पनि गरियो । तर पनि उद्योगीले फेरी अहिले मूल्य बढाउन सुरु गरेका छन् ।
यसरी अप्राकृतिक रुपमा मूल्य कायम गरेर उपभोक्ता ठग्नेले करोड माथि कमाउने र सरकारले ३ लाख मात्रै कार्वाहि गरेर उन्मुक्ती दिने गरेकाले उनिहरुलाई झनै मूल्य बढाउन हौसला मिलेको उपभोक्ताकर्मि बताउँछन् ।
विभागले तीन लाख भन्दा बढि कार्वाहि गर्न सक्ने व्यवस्था छैन । कि त उपभोक्ता हित संरक्षण ऐन नै संसोधन गरि ठगि बराबरको जरिवाना गर्नुपर्याे कि त विभागले यस्तोमा कार्वाहि नगरि ठगि मुद्दा अनुसार अदालतमा मुद्दा चलाउनुपर्याे । अन्यथा अन्तर्राष्ट्रिय बजारमा १० देखि १५ प्रतिशत कच्चा तेलको भाउ बढ्दा यहाँ ५३ प्रतिशतसम्म भाउ बढाउने क्रम रोकिनेछैन ।
