काठमाडौं, असार १७
इटालियन सिरि ‘ए’ मा युभेन्ट्सले जेनोलाई पराजित गरेको छ। मंगलबार राति भएको खेलमा युभेन्ट्सले जेनोलाई ३–१ ले पराजित गरेको हो ।
युभेन्टसको जितमा क्रिस्टियानो रोनाल्डो , पाब्लो डिबाला र ड्युगलस कोस्टाले एक-एक गोल गरेका हुन्। युभेन्टसले सबै गोल दोस्रो हाफमा गरेको थियो । जेनोका लागि एन्ड्रिया पिनामोन्टीले एक गोल गरे ।
खेलको ५० औँ मिनेटमा युभेन्टसका पाब्लो डिबालाले गोल गर्दै टोलीलाई अग्रता दिलाएका थिए। डिबालाले सो गोल एकल प्रयासमा गरेका हुन् । त्यसको ६ मिनेटमा रोनाल्डोले २५ यार्ड टाढाबाट उत्कृष्ट गोल गर्दै युभेन्टसको अग्रता दोब्बर पारे । सो गोल रोनाल्डोको यो सिजनको लिगमा २४ औं गोल हो।
त्यसपछि ७३ औ मिनेटमा ड्युगलस कोस्टाले गोल गर्दै टोलीलाई ३–० को अग्रता दिलाए । त्यसको ३ मिनेटमा जेनोका लागि एन्ड्रिया पिनामोन्टीले एक गोल फर्काए । त्यसपछि कुनै गोल हुन सकेन र युभेन्टसले जित निकालेका हो ।
जितसँगै युभेन्टसले लिगको शीर्षस्थानमा ४ अंकको अग्रता बनाएको छ । युभेन्टसको २९ खेलबाट ७२ अंक छ । समान खेल खेलेको लाजियोको ६८ अंक सहित लिगको दोश्रो स्थानमा छ। तेश्रो स्थानमा रहेको इन्टर मिलानको २८ खेलबाट ६१ अंक छ। गए राति दोस्रो स्थानमा रहेको लाजियोले टोरिनोलाई २-१ ले पराजित गरेको छ ।
