काठमाडौं, असार १७
स्पेनिस ला लिग अन्तर्गत गएराति भएको खेलमा बार्सिलोना एट्लेटिको मड्रिडसंग बराबरीमा रोकिएको छ। मंगलबार राति घरेलु मैदान नोउ क्याम्पमा भएको खेलमा बार्सिलोनाले एट्लेटिकोसँग २ – २ गोलको बराबरी खेल्दै अंक बाँढेको हो ।
एट्लेटिकोका डिएगो कोस्टाले खेलको ११ औँ मिनेटमा आत्मघाती गोल गरेपछि बार्सिलोनाले अग्रता लिएको थियो । साउल निगाजले १९ औं मिनेटमा पेनाल्टीमा गोल गर्दै एट्लेटिकोका लागि बराबरी गोल फर्काए ।
खेलको ५० औं मिनेटमा कप्तान मेसीले पेनाल्टीमा दोस्रो गोल गर्दै बार्सिलोनालाई २-१ को अग्रता दिलाए । कप्तान लिओनल मेसीले बार्सिलोनाका लागि सो गोल गरेर आफ्नो करियरमा सात सयौँ गोल पूरा गरेका छन् ।
त्यसपछि खेलको ६२ औं मिनेटमा साउल निगाजले पेनाल्टीमा व्यक्तिगत दोस्रो गोल गर्दै खेल बराबरीमा ल्याए । त्यसपछि कुनै गोल हुन सकेन र खेल बराबरीमा रोकिएको हो ।
बराबरीसँगै बार्सिलोना लिगको दोस्रो स्थानमा कायम रहेको छ । बार्सिलोनाले ३३ खेलबाट ७० अंक जोडेको छ । एक खेल कम खेलको रियलको ७१ अंक छ र लिगको शीर्ष स्थानमा छ ।तेस्रो स्थानको एट्लेटिको ३३ खेलबाट ५९ अंक छ ।
