अत्तरिया, २३ जेठ
सुदूरपश्चिम प्रदेशका मुख्यमन्त्री त्रिलोचन भट्टले स्वास्थ्य क्षेत्रलाई प्राथमिकतामा राखेर बजेट विनियोजन गरिने बताउनुभएको छ ।
आज प्रदेशसभाको नीति तथा कार्यक्रममाथिको छलफललाई सम्बोधन गर्दै उहाँले प्रदेश सरकारको पहिलो प्राथमिकता स्वास्थ्य क्षेत्र भएको उल्लेख गर्दै कृषि, रोजगारीलाई पनि प्राथमिकतामा राखेर बजेट विनियोजन गरिने बताउनुभयो ।
प्रदेशमा सङ्क्रामक रोग अस्पताल सञ्चालन गर्ने तयारी रहेकाले क्यान्सर अस्पताल निर्माण गर्ने कुरामा प्रदेश सरकारले जोड दिइरहेको उहाँको भनाइ छ । प्रदेश सरकारले ल्याएको नीति तथा कार्यक्रम कार्यान्वयन गर्नेु नै मुख्य कुरा रहेको बताउँदै उहाँले भन्नुभयो, “अब नीति तथा कार्यक्रम कागजमा मात्र होइन व्यावहारिकरुपमा कार्यान्वयन हुन्छ ।”
उहाँले भारत तथा प्रवासबाट फर्केका सुदूरपश्चिमवासीलाई रोजगारीको व्यवस्था गर्न जिल्ला तथा स्थानीय तहमा निर्माण गरिने सडक, नाली, विकास निर्माणलगायत तथा कृषि क्षेत्रमा संलग्न गराई मौसमी रोजगार उपलब्ध गराइने बताउनुभयो ।
उहाँले अन्तर्राष्ट्रिय सीमासँग जोडिएका क्षेत्रमा प्रदेश सरकारले बस्तीको विकास, त्यहाँका नागरिकको जीवन उकास्ने कार्यक्रम, सुरक्षा व्यवस्थालगायतका विशेष योजना ल्याउने उल्लेख गर्नुभयो । उहाँले सङ्घीय सरकारको सहकार्यमा प्रदेश र स्थानीय तहबाट पश्चिम सेती अघि बढाउन सङ्घीय सरकारलाई आग्रह गरिने बताउनुभयो ।
मुख्यमन्त्री भट्टले अब योजना, कार्यक्रम, प्रदेशसभा सदस्यको मागका आधारमा रकम विनियोजन गरिने बताउँदै भन्नुभयो, “पटकपटक डल्लो बजेटका नाममा सरकार बदनाम भएकाले अब डल्लो होइन, जति योजना, कार्यक्रम छन् त्यहीअनुसार रकम विनियोजन हुन्छ, जनप्रतिनिधि, प्रदेशवासी सबैका योजना सम्बोधन गर्नेमा प्रदेश सरकार कटिबद्ध रहेको छ ।” रासस
