• गृहपृष्ठ
  • लकडाउन उल्लघंन गर्ने १७ सय ४८ जना नियन्त्रणमा

लकडाउन उल्लघंन गर्ने १७ सय ४८ जना नियन्त्रणमा

Apr 30th, 2020

काठमाण्डौ, बैशाख १८

काठमाण्डौ उपत्यकामा लकडाउन उल्लघंन गर्ने चार सय ७६ महिला सहित १७ सय ४८ जनालाई नियन्त्रणमा लिएको छ । आज विहान छ बजे देखि दिउसो चार बजे सम्म उक्त संख्यामा नियन्त्रणमा लिएको हो । यसै गरी छ सय ३४ वटा दुई पाङ्ग्रे र ५१ वटा चारपाङग्रे गरी छ सय ८५ वटा सवारी साधनलाई पनि नियन्त्रणमा लिएको छ । काठमाण्डौमा सबै भन्दा बढी १३ सय २०, ललितपुरमा तीन सय ७५ र भक्तपुरमा ५३ जनालाई नियन्त्रणमा लिएको छ ।

कोभिड–१९ को विश्वव्यापी महामारी फैलिएपछि नेपालमा हुने सम्भावित जोखिम रोक्न सरकारले यही चैत ११ गते बिहान ६ बजेदेखि लागू हुने गरी देश व्यापीरूपमा लकडाउनको आदेश जारी गरेकाले लकडाउन उल्लघंन गर्नेलाई नियन्त्रणमा लिई तीन घण्टा कोरोनाको बारेमा शिक्षा दिने र छाड्ने गरिएको महानगरीय प्रहरी कार्यालयका प्रमुख प्रहरी नायव महानिरीक्षक विश्वराज पोखरेलले जानकारी दिए ।

लकडाउन एउटा व्यक्ति वा समुहको फाईदाको लागि गरिएको नभएर तपाई हाम्रो सम्पुर्णको सुरक्षाको लागि सरकारले सो निर्णय गरेकाले अत्यावश्यक काम बाहेक घरबाट बाहिर ननिस्कन पनि सवैलाई उहाँले आग्रह गर्नु भयो । साथै यस कार्यालय तथा स्थानिय निकायको समन्वयमा एक सय ४५ जना विपन्न मजदुरहरूलाई राहत सामग्री वितरण गरिएको छ ।