वालिङ, २३ फागुन (रासस)
भूमि व्यवस्था, सहकारी तथा गरिबी निवारणमन्त्री पद्माकुमारी अर्यालले जग्गा प्रशासन पारदर्शी र सुशासनको गतिमा अगाडि बढेको बताउनुभएको छ । हिजो नापी/नक्सामा देखिएका समस्यालाई आधुनिक प्रविधिका माध्यमबाट अगाडि बढाउन शुरु गरिएसँगै समाधान भएर जाने मन्त्री अर्यालले बताउनुभएको हो ।
स्याङ्जाको वालिङमा आज नापी कार्यालयको नवनिर्मित भवनको उद्घाटन तथा स्याङ्जा जिल्ला पुनः नाप/नक्सा शुभारम्भ कार्यक्रममा मन्त्री अर्यालले हिजो अनुमानमा गरिएका कित्ताकाट अब डिजिटल प्रविधिसँगै सरल र सहज हुनुका साथै जग्गामा देखिएका समस्या अन्त्य भई सुशासनको पाटोमा अगाडि बढ्ने वातावरण बनेको बताउनुभयो ।
“हिजोका दिनमा ढड्डा पल्टाउनुपर्ने, फिता लिएर प्राविधिक तथा जग्गाधनी हिँड्ने गर्नुहुन्थ्यो”, मन्त्री अर्यालले भन्नुभयो, “अब नयाँ प्रविधिको शुरुआतसँगै हिजोका समस्या पनि हटेर गएका छन् भने जग्गामा देखिएका विवाद पनि क्रमशः समाधान गर्दै जानमा यसले टेवा पुग्ने विश्वास छ ।”
आधुनिक एवं उन्नत प्रविधिको माध्यमबाट हिजो जमीन नापजाँचका क्रममा देखिएका त्रुटि, छुटेका जमीन वा नापी नक्सामा देखिएका अन्य समस्या समाधान गर्ने कार्यको शुरुआत भएको बताउँदै यस प्रविधिको कार्यान्वयनका लागि सबैको सहयोग आवश्यक रहेको मन्त्री अर्यालको भनाइ थियो ।
फरक प्रसङ्गमा बोल्नुहुँदै मन्त्री अर्यालले भन्नुभयो, “अबको दिशा विकास र समृद्धिको हो, हामी खण्डित भएर होइन कि जनताले देखेको सपना पूरा गर्नका लागि सबै राजनीतिक दल एकबद्ध भएर अगाडि बढ्नुको विकल्प छैन, होइन भने जनताले हामीप्रति गरेको आशा निराशामा परिणत हुनेछ ।”
कार्यक्रममा गण्डकी प्रदेश विधायन समिति सभापति मोहनप्रसाद रेग्मी, गण्डकी प्रदेशसभा सदस्य मीनप्रसाद गुरुङ, भूमि व्यवस्था विभागका महानिर्देशक प्रकाश जोशी, सचिव केदार न्यौपाने, वालिङ नगरप्रमुख दिलीपप्रताप खाँण, पुतलीबजार नगरप्रमुख सीमाकुमारी क्षेत्री, आँधीखोला गाउँपालिकाका अध्यक्ष सुधीरकुमार पौडेल, नेकपा स्याङ्जाका अध्यक्ष सूर्यप्रसाद गैरे, नेपाल महिला सङ्घ केन्द्रीय उपाध्यक्ष सरस्वती अर्याल तिवारी, वालिङ उद्योग वाणिज्य सङ्घका अध्यक्ष शोभाकान्त पौडेल, जग्गादाता डोलराज तिवारीलगायतले प्रविधिको अभावका कारण विगतमा जग्गा नापजाँच गर्दा देखिएका त्रुटि, अलमल सुधार गर्दै सेवालाई थप व्यवस्थित गर्नमा सघाउ पुग्ने विश्वास व्यक्त गर्नुभएको थियो ।
भवन कूल एक रोपनी चार आना क्षेत्रफलमा फैलिएको छ । नवनिर्मित भवनमा तीन तलाको १४ कोठासहित शौचालय, खाजाघर, सभाहल रहेको छ । उक्त भवन विसं २०७३ कात्तिकमा आत्रेय ब्रह्मायाणी कामख्य जेभी काठमाडौँसँग ठेक्का सम्झौता भई २०७६ मङ्सिरमा निर्माण सम्पन्न भएको हो । रु दुई करोड आठ लाख ४६ हजार २०८ लागतमा भवन निर्माण गरिएको नापी कार्यालय वालिङका प्रमुख विवेक तिवारीले बताउनुभयो ।
नापी कार्यालयले स्याङ्जाका साविकका ३१ गाउँ विकास समितिअन्तर्गत हालका चार नगरपालिका र तीन गाउँपालिकामा सेवा दिँदै आएको छ ।
