काठमाडौ, फागुुन १६
बोधी श्रवण धर्म संघले यही फागुन १७ गते शनिवार काठमाडौंमा शान्ति पदयात्राको आयोजना गर्ने भएको छ । काठमाडौंको भृकुटी मण्डपबाट विहान ८ बजे शुरु हुने सो पदयात्रालाई संघले विश्व शान्ति महा मै मैत्री शान्ति पदयात्रा भनेको छ ।
पदयात्रा काठमाडौंको भृकुटीमण्डपबाट शुरु भएर भद्रकाली, सुनधारा, न्युरोड, इन्द्रचोक, असन, जमल, केशरमहल, दरवारमार्ग, घण्टाघर, बागबजार, पुतलीसडक र पद्मोदय मोड हुँदै भृकुटी मण्डपमा आएर सभामा परिणत हुने छ । संघका अनुसार शान्ति पद यात्रा समापन भएलगत्तै धार्मिक परिसंवाद कार्यक्रम पनि आयोजना गरिएको छ । सो परिसम्वाद कार्यक्रमलाई संघले बोधि श्रबण संघ महा मै मैत्री धर्म परिसम्वाद कार्यक्रम भनेको छ ।
यो परिसम्वाद काठमाडौंको भृकुटी मण्डपस्थित मुल हलमा संचालन हुने छ । परिसम्वाद कार्यक्रममा समाजका लब्धप्रतिष्ठित, विद्वत वर्ग, संस्कृतीबिद् तथा विभिन्न धर्मका गुरुहरुले आफ्ना विचारहरु राख्नुहुनेछ । संघले पदयात्रा र परिसम्बाद दुबै कार्यक्रममा सहभागीहुन सम्पूर्ण संघ, भक्त, अनुयायी, धर्मप्रेमी, बुद्दीजिवी, लेखक, कलाकार, वकिल, मजदूर, किसान, उद्योगी, व्यापारी, इन्जिनियर, डाक्टर, लगायत सबैलाई हार्दिक आग्रह पनि गरेको छ ।
यसैगरी संघले सो कार्यक्रममा सहभागी भई सम्पूर्ण जगतको रक्षा सहजीवन सहअस्तित्व र मुक्ति मोक्षमा योगदान गर्न र लाभ लिन समेत मैत्रीय आव्हान गरेको छ ।
