आधारभूमी संवाददाता
काठमाडौं,माघ २०
काठमाडौं उपत्यकामा कुखुराको मासुुको भाउँ ह्वात्तै बढेको छ । साथै कुखुराको मासुु बेच्ने पसलेहरुले पनि अहिले मागे बमोजिम मासु बेच्न पाएका छैनन् । अभावका कारण बजारमा कुखुराको मासुको भाउ ह्वात्तै महंगीएको छ ।
चिसो समयका कारण उत्पादनमा ह्रास आएको केहि हदसम्म सत्य पनि हो । तर व्यवसायीको यस्तो तर्क पुरै सत्य भने छैन । डेढ महिनाअघि चल्ला उत्पादकहरुले चल्ला नष्ट गर्दा अहिले त्यसको असर बजारमा परेको छ । साथै व्यवसायीले पनि चाहे बमोजिम कै भाउ बढेको छ ।
डेढ महिनाकै बिचमा भाउ ७५ प्रतिशत बढेको देखिन्छ । किनकी डेढ महिना अघि २ सय ४० रुपैयाँ प्रतिकेजी मासु खरिद गरेका ग्राहकले अहिले त्यही १ केजीलाई नै ४ सय ५ रुपैयाँ तिर्नुपर्ने स्थिती छ ।
डेढ महिना अघि कुखुराको मासुको भाउ अत्यन्त सस्तो भएको र यसले उद्योगी र कृषक दुबैको व्यवसाय संकटमा पर्न लागेको भन्दै ह्याचरी उद्योग संघले उत्पादीत कुखुरा र चल्ला निकाल्न तयार भएका अण्डा समेत नष्ट गरेको थियो । त्यस समयमा कृषकहरुले कुखुरा पाल्नका लागि चल्ला नै नपाउने स्थिती आयो । जसका कारण अहिले माग बमोजिमको ब्रोइलरको मासु उपलब्ध हुन नसकेको हो ।
व्यवसायीको मनोमानीका कारण अहिले ग्राहक भने मारमा परेका छ । व्यवसायीले मनोमानी ढङ्गले चल्ला नष्ट गरेर अहिले कुखुराको अभाव बनाएका छन् ।
व्यवसायीको माग र योजना बमोजिमनै अहिले कुखुराको मासुको भाउ बढेको छ । आफुहरुले उचित मूल्य नपाएको भन्दै ह्याचरी उद्योगसँघले डेढ महिना अघि ४० लाख चल्ला नष्ट गरेको थियो भने झन्डै ६० लाख अन्डा खाडलमा गाडेको थियो । जसको असर नै अहिले बजारमा देखिएको हो ।
बजारमा ग्राहकले मात्रै होइन , मासु पसलेले समेत आवश्यक मात्रामा कुखुराको मासु पाउन सकेका छैनन् । जसका कराण दिउसै पसल नै बन्द गर्नुपर्ने स्थिती आएको छ । पसलहरुमा अहिले फ्रेस चिकेन भन्दा पनि फ्रोजन चिकेन उपलब्ध हुन थालेको छ ।
व्यवसायीले यसरी कृत्रिम रुपमा भाउ बढाउँदा पनि सरकार भने मुकदर्शक बनेको छ । डेढ महिना अघि व्यवसायीहरुले चल्ला नष्ट नगरेको भए आज ग्राहक मारमा पर्ने थिएनन् । चल्ला नष्ट गर्ने न व्यापारी नत कार्टेलिङ गर्ने ह्याचरी संघ माथि नै सरकार कार्वाहिमा उत्रिन सक्यो । जसका कारण नै डेढ महिनाको अन्तरालमा ग्राहकले ७५ प्रतिशतसम्म बढि मूल्य तिर्नुपरेको छ ।
देश कुखुराको मासुमा आत्मनिर्भर भइसकेको छ । तर यसका लागि आवश्यक दाना भने अहिलेपनि विदेशबाटै आउने गरेको छ । जसका कारण कुखुराको उत्पादन लागत पनि उच्च छ । धेरै मासु सस्तीदा त्यसको मारमा किसान नै पर्ने गरेका छन् । जसका कारण अहिले व्यवसायीले मात्रै यसको लाभ लिएका छन् कि यसको लाभ किसान सम्म पनि पुगेको छ अध्ययन गर्न जरुरी छ ।
