काठमाडौं, २० पुस
स्पेनिस ला लिगामा रियल मड्रिडले गेटाफेलाई हराउँदै शीर्ष स्थानमा रहेको बार्सिलोनासँग अङ्क बराबरी गरेको छ । खेलमा रियल मड्रिडले गेटाफेलाई ३-० गोलले पराजित गरेको हो । शनिबार राति भएको डर्बी खेलमा बार्सिलोना एस्पानियोलसँग बराबरीमा रोकिएपछि रियल मड्रिडले अङ्क बराबरी गर्न सफल भएको हो ।
रियलका लागि राफायल भाराने र लुका मोड्रिकले एक–एक गोल गरे । अर्को गोल आत्मघाती रह्यो ।
रियलले खेलको ३४ औँ मिनेटमा आत्मघाती गोलबाट अग्रता लिएको थियो । खेलको ३४ औं मिनेटमा भारानेको प्रहार रोक्ने क्रममा गेटाफेका गोलरक्षक डेविड सोरियाले आफ्नै पोस्टमा गोल गर्न पुगे । दोस्रो हाफमा टोनी क्रुसको फ्रिकिकमा राफायल भरानले हेडरमार्फत गोल गर्दै टोलीको अग्रता दोब्बर बनाए । इन्जुरी समयमा फेडेरियो भाल्भर्डेको पासमा लुका मोड्रिकले गोल गर्दै टोलीको जितलाई ३-० बनाएका थिए।
बराबरीपछि बार्सिलोना र रियलको समान ४० अङ्क रहेको छ । तर, गोल अन्तरका आधारमा बार्सिलोना शीर्ष स्थानमा कायम रहेको छ ।
