घ्याल्चोक (गोरखा)(, ३० मङ्सिर (रासस)
कोरियाली सहयोगमा गण्डकी गाउँपालिका–८, सुन्दरबस्तीको लोकरत्न सामुदायिक सिकाइ केन्द्रको नवनिर्मित भवनको आइतबार उद्घाटन गरिएको छ । संयुक्त राष्ट्रसङ्घीय शैक्षिक, वैज्ञानिक तथा सांस्कृतिक सङ्गठन (युनेस्को) का निमित्त कोरियाली राष्ट्रिय आयोग र युनेस्कोका निमित्त नेपाल राष्ट्रिय आयोगको रु एक करोड ३० लाखको सहयोगमा सात महिनामा उक्त दुईतले भवन बनेको हो । हाल मुलुकभर दुई हजार ५१ यस्ता केन्द्रहरु छन् । विसं २०६८ मा खोलिएको सो केन्द्रको सामान्य भवन रहेकामा विनाशकारी भूकम्पले ध्वस्त भएको थियो ।
शिक्षा, विज्ञान तथा प्रविधि मन्त्रालयका सचिव महेशप्रसाद दाहाल र युनेस्को कोरिया आयोगका महासचिव किम ख्वाङ्गोले भवनको उद्घाटन गर्नुभयो । सचिव दाहालले भवनको सदुपयोग गरी सामुदायिक विकास गर्न आग्रह गर्दै यस्ता केन्द्रहरुलाई स्थानीय तहले सुव्यवस्थित सञ्चालन गर्नुपर्ने बताउनुभयो । उहाँले दिगो विकासको लक्ष्यअनुसार समावेसी तथा न्यायोचित गुणात्मक शिक्षा सुनिश्चित गर्दै सबैका लागि जीवनपर्यन्त सिकाइका अवसरहरु प्रवद्र्धन गर्न राष्ट्रिय कार्य ढाँचा तयार भएको जानकारी दिनुभयो ।
महासचिव ख्वाङ्गोले आफूहरुको यस प्रकारको सहयोग र सद्भावको थालनी भएको भन्दै सहयोगको निरन्तरताको प्रतिबद्धता व्यक्त गर्नुभयो । युनेस्को नेपाल आयोगका सहायक महासचिव डा बाबुराम अधिकारीले सो केन्द्र समुदायकै सम्पत्ति भएकाले सदुपयोग गर्न आग्रह गर्नुभयो । सो भवनका लागि केन्द्रका अध्यक्ष विष्णुमणि रेग्मीले करीब रु १६ लाख पर्ने आठ आना जग्गा दान गर्नुभएको थियो । गाउँपालिका–८ का अध्यक्ष रामप्रसाद रेग्मीले सामुदायिक केन्द्रका लागि कोरियाली उक्त आयोगले दक्षिण एशियामै पहिलो केन्द्रका रुपमा लोकतत्न भवनलाई छनोट गरेको जनाउनुभयो ।
