काठमाडौं, २४ मंसिर
सर्लाही, रुपन्देही, धनुषा, बाँके, मकवानपुर र झापाका विभिन्न स्थानमा भएको छुट्टाछुट्टै सवारी दुर्घटनामा परी ६ जनाको मृत्यु भएको छ ।
सर्लाही, मलंगवा नगरपालिका ४ बिश्वकर्मा चोकस्थित सडकमा ज.त २६६६ नम्बरको ट्याक्टरले बिआर ३० आर ४९४१ नम्बरको मोटरसाइकललाई सोमबार साँझ ठक्कर दिँदा मोटरसाइकलमा सवार सर्लाही चक्रघट्टा गाउँपालिका ९ बस्ने २७ वर्षीया संगिता देवीको घट्नास्थलमै मृत्यु भएको छ । ट्याक्टर चालकलाई प्रहरीले नियन्त्रणमा लिएको छ ।
रुपन्देही, सियारी गाउँपालिका ७ भर्तापुरस्थित सडकमा लु.२ ख १७२८ नम्बरको टिपर सोमबार राति दुर्घटना हुँदा टिपर चालक रुपन्देही शुद्धोधन गाउँपालिका ३ बतेनी बस्ने ३० वर्षीय राज कुमार यादवको घट्नास्थलमै मृत्यु भएको छ ।
धनुषा, नगराईन नगरपालिका २ स्थित सडकमा ज.२ त ३११ नम्बरको ट्याक्टर अनियन्त्रित भई बाटो छेउमा रहेको पोखरीमा पल्टिएर सोमबार राति दुर्घटना हुँदा गम्भीर घाइते भएका ट्याक्टर चालक सोही नगरपालिका २ बस्ने ३५ वर्षीय ललन सदालाई उपचारको लागि प्रादेशिक अस्पताल जनकपुरतर्फ लैजाने क्रममा बाटोमै मृत्यु भएको छ ।
बाँके, कोहलपुर नगरपालिका ११ चौराहास्थित सडकमा भे.७ प २१५५ नम्बरको मोटरसाइकल अनियन्त्रित भई मंगलबार बिहान दुर्घटना हुँदा गम्भीर घाइते भएका मोटरसाइकल चालक कोहलपुर नगरपालिका ५ रझेना बस्ने २३ वर्षीय सुभाष कार्कीको मेडिकल कलेज कोहलपुरमा उपचारको क्रममा मृत्यु भएको छ ।
मकवानपुर, मनहरी गाउँपालिका ९ रजैयास्थित सडकमा ना.४ ख ७४३७ नम्बरको ट्रकले ना.५१ प २१८ नम्बरको मोटरसाइकललाई सोमबार साँझ ठक्कर दिँदा गम्भीर घाइते भएका मोटरसाइकल चालक मकवानपुर हटौंडा उपमहानगरपालिका १ बस्ने ३५ वर्षीय सुरेन्द्र आले मगरको चुरेहिल अस्पताल हुँदै मेडिकल कलेज चितवनमा थप उपचारको क्रममा मृत्यु भएको छ । दुर्घटनामा घाइते भएका मोटरसाइकलमा सवार मनहरी गाउँपालिका ५ दरदरा बस्ने २५ वर्षीय सुरेश स्याङतानको मेडिकल कलेज चितवनमा उपचार भइरहेको छ । ट्रक र चालकलाई प्रहरीले नियन्त्रणमा लिएको छ ।
झापा, कन्काई नगरपालिका ४ कोटीहोमस्थित सडकमा ना.५ ख ७६६० नम्बरको ट्रकमा मंगलबार बिहान को.३९ प ७५४ नम्बरको मोटरसाइकल ठोक्किएर मे.१ च ४२८१ नम्बरको कारमा समेत ठोक्किदा गम्भीर घाइते भएका मोटरसाइकल चालक मोरङ अमरदह नगरपालिका २ बस्ने २३ वर्षीय किशन साहको बिएण्डसी अस्पताल बिर्तामोडमा उपचारको क्रममा मृत्यु भएको छ । साथै ना.५ ख ७६६० नम्बरको ट्रकमा मे.७ प ४६७१ नम्बरको मोटरसाइकल ठोक्किदा घाइते भएका मोटरसाइकल चालक झापा कमल गाउँपालिका ७ बस्ने २१ वर्षीय गौरब मिश्रको सोही अस्पतालमा उपचार भइरहेको छ । ट्रक र कारका चालकलाई प्रहरीले नियन्त्रणमा लिएको छ ।
दुर्घटनाका सम्बन्धमा स्थानीय प्रहरीले आवश्यक अनुसन्धान गरिरहेको छ ।
