बेझाड, १९ मङ्सिर (रासस)
पाल्पाको तिनाउ गाउँपालिका–३ झुम्सास्थित तिनाउ माविमा सञ्चालन भएको श्रीमद्भागवत धनधान्याञ्चल सप्ताह ज्ञान महायज्ञमा रु पाँच करोड बराबरको दान सङ्कलन भएको छ ।
यही मङ्सिर १२ देखि १८ गतेसम्म आयोजना भएको महायज्ञमा श्रद्धालु भक्तजन, सामाजिक सङ्घसंस्था, व्यक्ति र सरकारी अनुदानसहित रु पाँच करोड बराबरको दान सङ्कलन भएको प्रधानाध्यापक झविन्द्र ज्ञवालीले जानकारी दिनुभएको छ । महायज्ञ अवधिभर श्रद्धालु भक्तजन, व्यक्ति, सामाजिक सङ्घसंस्थाबाट गरी रु एक करोड ७० लाख रकम सङ्कलन भएको छ । बाँकी रकम स्थानीय, प्रदेश र सङ्घीय सरकार तथा विभिन्न सरकारी कार्यालयबाट विद्यालयको भौतिक पूर्वाधार निर्माणमा सहयोग उपलब्ध गराउने प्रधानाध्यापक ज्ञवालीले बताउनुभयो ।
पाल्पामै पहिलोपटक प्राविधिक शिक्षातर्फ अटोमोबाइल्स शिक्षा सञ्चालन गर्ने उद्देश्यले महायज्ञ आयोजना गरिएको हो । सांसद सोमप्रसाद पाण्डेले आगामी आर्थिक वर्ष रु ३० लाख बजेट विनियोजन गर्ने प्रतिबद्धता जनाउनुभएको छ । त्यस्तै प्रदेश नं ५ का सामाजिक विकासमन्त्री सुदर्शन बराल, प्रदेशसभा सदस्य डा पुरनमान बज्राचार्य र तुलाराम घर्ती मगरले प्रदेश सरकारबाट भवन निर्माणका लागि रु एक करोड २८ लाख उपलब्ध गराउने प्रतिबद्धता जाहेर गर्नुभएको छ ।
तिनाऊ गाउँपालिकाले यो वर्ष र आगामी वर्ष गरी रु एक करोड १८ लाख बजेट भवन निर्माणका लागि विद्यालयलाई उपलब्ध गराउने घोषणा गरेको छ । पण्डित दीनबन्धु पोखरेलले सङ्गीतमय शैलीमा कथावाचन गर्नुभएको महायज्ञ अवधिभर पाँच हजारभन्दा बढी श्रद्धालु भक्तजनको सहभागिता थियो । आज महायज्ञको समापन गर्दै प्रदेशसभा सदस्य तुलाराम घर्ती मगरले महायज्ञमा प्राप्त रकमबाट छिटोभन्दा छिटो भौतिक पूर्वाधार निर्माण सम्पन्न गर्न विद्यालयलाई अनुरोध गर्नुभयो ।
पाल्पा जिल्लामै प्राविधिकधारतर्फ अटोमोबाइल्स शिक्षा सञ्चालन हुने भएपछि यस क्षेत्रका विद्यार्थीलाई अन्यत्र पठनपाठनका निम्ति ठूलो रकम खर्चनु नपर्ने गाउँपालिकाका अध्यक्ष ओमबहादुर घर्ती मगरले बताउनुभयो । प्राविधिक शिक्षातर्फ १८ महिने अटोमोबाइल्स शिक्षा सञ्चालन गर्न रु सात करोड ४१ लाख बराबरको भौतिक संरचना निर्माण गर्न विस्तृत परियोजना प्रतिवेदन (डिपिआर) तयार भइसकेको छ ।
