काठमाडाैं, २६ कात्तिक
नेपाल क्लियरिङ्ग हाउस लिमिटेडले आफ्नो आठौं वार्षिक साधारण सम्पन्न भएको छ । कम्पनीको सोमबार सम्पन्न भएको सभाले चुक्ता पूँजी २१.६ करोड रुपैयाँ रहेकोमा ३८ प्रतिसत बोनस शेयर वितरण गरी २९.८ करोड रुपैयाँ पुर्याउने निर्णय गरेको छ । साथै बोनस शेयर ट्याक्स प्रयोजनका निम्ती २ प्रतिसत नगद लाभांश पनि वितरण गर्ने निर्णय गरेको छ । कम्पनीको अधिकृत पूँजी पनि वृद्धि गरी ५० करोड पुर्याइने निर्णय गरेको छ । आ.व. २०७५/७६ मा कम्पनीले २३७,७३५,७८६ रुपैयाँ खुद नाफा गरेको कम्पनीले जनाएको छ ।
कम्पनीले पूँजी वृद्धि गरी भुक्तानी प्रणाली पूर्वाधार विकास तथा विस्तार गर्ने, थप प्रणालीहरु ल्याउने तथा जोखिम व्यवस्थापना सुढृढ बनाउने योजना बनाएको छ । नेपाल राष्ट्र बैंकको नियमअनुसार नेपाल भित्र कार्य गर्ने भुक्तानी प्रणाली सन्चालक (पिएसओ) को चुक्ता पुँजी कम्तिमा १० करोड तथा नेपाल बाहिर कार्य गर्नका लागी २५ करोड रहनु पर्ने व्यवस्था रहेको छ ।
कम्पनीका अनुसार आ.व. २०७५/७६ मा एनसिएचएल ईसीसी मार्फत कुल ११,७५५,०७२ चेक राफसाफ भएको थियो भने अन्तरबैंक विद्युतीय भुक्तानी प्रणाली (एनसिएचएल आईपिएस बाट ४,९३१,९५० तथा कनेक्ट आईपिएस ई पेमेन्ट प्रणालीमार्फत १८६,०४१ भुक्तानी कारोबारहरु भएको थियो । कम्पनीले आफ्नो भुक्तानी प्रणालीहरु मार्फत आ.व. २०७५/७६ मा कुल ९२ खर्ब बराबरको भुक्तानी कारोबारहरु राफसाफ गरेकोमा दैनिक औसत कारोवार ६७,४७९ रहेको थियो जुन औसत दैनिक रकम.३६.८५ अर्ब रुपैयाँ रहेको थियो । हाल ८० सदस्य बैंक तथा वित्तीय संस्थाहरुका ५,००३ शाखाहरुबाट कम्पनीले आफ्ना सेवाहरु प्रदान गरिरहेको छ भने कम्पनीमा २२ गैर–बैंकिङ संस्थाहरु अप्रतक्ष्य र प्राविधिक सदस्यहरुकोरुपमा आवद्ध छन् ।
नेपाल क्लियरिङ्ग हाउस लिमिटेड, नेपाल राष्ट्र बैंक (१० प्रतिसत), बैंक तथावित्तीय संस्थाहरु (८० प्रतिसत) र स्मार्ट च्वाइस टेक्नोलोजिज् प्रा.लि. (१० प्रतिसत) द्वारा प्रवद्र्धित कम्पनी हो । यसले नेपालमा राष्ट्रिय भुक्तानी प्रणालीहरु स्थापना र विस्तार गर्नुका साथै विभिन्न बैंक तथा वित्तीय संस्थाहरु, पिएसओ, पिएसपि, सरकारी तथा गैर सरकारी निकायहरुलाई भुक्तानी प्रणालीका सेवाहरु प्रदान गर्दै आएको छ ।
