काठमाडौं, ३० असोज
सरकारले चालु आ.वको लागि ल्याएको १५ खर्ब ३२ अर्ब ९६ करोड रुपैयाँको बजेटको ११.४१ प्रतिशत खर्च गरेको छ । सरकारले चालु आर्थिक वर्षको पहिलो ३ महिनामा एक खर्ब ७४ अर्ब ९२ करोड खर्च गरेको हो ।
सो रकम सरकारले गत साउनदेखि असोजसम्मको अवधिमा खर्च गरेको हो । हालसम्म भएको खर्च चालु आवको लागि विनियोजित चालु बजेटको १६.१७ प्रतिशत हो । चालु आवको लागि सरकारले नौ खर्ब ५७ अर्ब १० करोड खर्च विनियोजन गरेको छ ।
तीन महिनाको यस अवधिमा सरकारले विनियोजित पूँजीगत खर्चको ४.३८ प्रतिशत अर्थात १७ अर्ब ९७ करोड रुपैयाँमात्र खर्च गरेको छ । भदौ महिनासम्म ५ अर्ब १३ करोड रुपैयाँ खर्च भएको थियो । त्यसैगरी असोज महिनामा सो खर्च बढेर पौने १३ अर्बभन्दा पुगेको छ । अर्थ मन्त्रालयका अनुसार यहि अनुपातमा खर्च हुँदै जाने हो भने सरकारले चालु आवको लागि विनियोजन गरेको पूँजी खर्च हुने छ ।
सरकारले यस आवको लागि चार खर्ब आठ अर्ब पूँजीगत खर्च विनियोजन गरेको थियो ।
खर्च भन्दा राजस्व बढि
सरकारले खर्चको तुलनामा राजस्व वढि उठाएको छ । यस अवधिमा सरकारले एक खर्ब ८२ अर्ब ७० करोड राजस्व संकलन गरेको तथ्याङ्क छ । सरकारले भदौ महिनासम्म सरकारले एक खर्ब ३३ अर्ब राजस्व संकलन गरेको थियो । संकलित राजस्व कूल राजस्व लक्ष्यको १६.४३ प्रतिशत हो ।
चालु आवको लागि ११ खर्ब १२ अर्ब तीन करोड राजस्व संकलन गर्ने लक्ष्य सरकारले राखेको छ ।
